Rooj, 13 januari 2023,
Wae Prins Stan 1e,
Op 30 maart 1991 gebore op de Nantestraot as jòngste zoon van Pé van Vrinssen Thei en Heurs An en Lenie van Harrie van Hoube Tjeu en Fien van Snelle Frens.
Nao ein aantal jaore nao de Lambrookweeg verhoestj woeë ich same mèt miene broor Wouter groeët bin gewore. Inmiddels woeën ich al ein aantal jaor oppe Walestraot woeë ich vanoet binne kan zeen weem bie de bar op terras zitj, zoeëdet ich weit wie snel ich mich dae kantj op mòt make.
Via de Doezendjpoeët en de Philips van Horne terecht gekome op de Rooi Panne in Eindhove. Dao hebbe ze mich het horecavak gelieërdj. Allein realiseerdje ich mich al snel det ich lever áán het buffet staon dan der achter. Daoròm heb ich doorgelieërdj op Zuyd Hogeschool in Haerle, woeë ich bin aafgestudeertj als Facility Manager. Bin noê werkzaam als consultant bie BaanHuis in Wieërt. Hiê zörg ich er veur det minse ein fijn baan kriege en bedrieve zat personieël hebbe.
Ouch naeve mien wirk hoof ich mich neet te vervaele. Zoeë zit ich mich al jaore in veur KVW, staon ich op zònnigmörge naeve het veldj als leider van het 2e, lèk ich op dinsdigaovendj ein kaertje en houw ich op woonsdig ein belke op de padelbaan. Dao naeve wete ze mich uch nog dik te vinje aster get georganiseerdj mòt waere.
Gruuëts bin ich op miene vrinjegroep Lucky 13, die dit jaor veur het ieërst oetgedaagtj waere veur ‘t make van eine Prinsewage. Gelökkig bin ich ouch eine halve snul, die zölle heur steinke toch ouch waal biêdrage?
Bin noê Prins bie de grasie van aod Prins Sten 1e en Prinses Loes, Vorst Geert-Jan, De Raod van Elf en de kepel.
Wae doon uch wete det:
Ten 1e
Nao 1,5 jaor te hebbe mòtte zwiêge, staon ich hiê dan eindelik as prins op de Boontje Aovendj.
Hieëlemaol klaor veur eine complete vastelaovendj!
Ten 2e
Mèt mien Sikkendante heb ich eine goje klik.
Ouch tiejes KVW kin ich al jaore raekene op Jordi en Rick!
Ten 3e
Veurig jaor hebbe Sanne & Sam dae biezunjere vastelaovendj gedrage.
Same mèt ‘t noewe jeugdprinsenpaar gaon wae ouch deze vastelaovendj laote slage!
Ten 4e
The Masked Zoatmaal waas ein grandioos succes veurig jaor.
Ich vermòmdj as olifantj door ‘t törp, det waas echter waal ein gevaor.
Ten 5e
Ein vreiselik sjoeën boetetonieël ane Brookmeule leet os allemaol efkes Zoatmaal veule.
Wat kinne ze in Rooj geweldjig tonieël speule!
Ten 6e
De ein nao de anger zaak in Rooj steit ter euvername of geit op de fles.
Weem bringtj de horeca in ‘t törp weer tot ein succes?
Ten 7e
Brevendia besteit 100 jaor!
Same veur goud, det kriege wae op dae fieëstaovendj waal klaor!
Ten 8e
Noê ouch de 3e editie van de Hieërezitting helaas nog efkes op zich lieëtj wachte,
moge inj dit jaor neet allein de Hieëre mer ouch de Dames eine geweldjige aovendj verwachte.
Ten 9e
KVW zeuktj al lange tiêd nao ein gesjikdje loeëds veur al heur materiaol en spelle.
Wètj gae nog emes, dae wae kinne belle?
Ten 10
De leedjesaovendj waas opnoe ein grandioos succes. De Doeve koste weer neet winne van de DT-club.
Mesjien toch mer ins op zeuk nao ein zangeres?
Ten 11e
Mèt ein lekker glaeske Palm in de hândj veul ich mich hieël op mien gemaâk.
Het leefst inne Bar woeë ich hem nog geregeldj tegooj raak!
Zoatmaale en Zoatmaalinne,
Nao 2 jaor sònger eine complete vastelaovendj, gaon wae d’r noê eindelik weer aan beginne. Belaeftj de vastelaovendj op eur eige maneer, mer in edergeval mèt völ lol en plezeer. Geneetj van deidanger en van deze sjoeëne tiêd, dao van kriegtj gae geine spiêt. Maaktj uch gein zörg, maaktj uch neet drök, mer straoltj van gelök.
Draagtj de vastelaovendj in eur hert, veultj uch de keuning te riêk, lètj good op eur vrouw, lèktj nog ein tientje biê en ‘t hèk is van de dam. Kiektj wie sjöppe 7 mer loup neet veur joker. Hangtj oet de roête en gaotj dees daag lekker mèt os nao boete. Veertj de vastelaovendj döbbel zoeë haard en speultj op het juuste moment de troêfkaart.
En det alles ònger miên devies,
Vastelaovendj same opstap, riêt oôp dae tap!
