Sikkendantepaâr
Luuk & Maud
Ich bin Luuk Huijsmans van Pe van Jac vanne Kets en Jeanne Coenjaarts en van Marleen van Brouns Jac en Dreijers Mieke. Als supply chain manager bie Stryker in Venlo zörg ich d’r veur det zekehoêze veurzeen zeen van kunstknieje, heupe en angere orthopedisch getuûg. In miene vrieje tiêd probeer ich nog eder waek ein belke raak te goeëje bie de basketbalclub van Wieërt. Miene mountainbike steit inmiddels al 4 jaor stoof te vange inne graasj. Maud en ich zeen same lid van v.v. de Dikke Snul, woeëvan wae dit jaor weer verwachte det ze mèt de optocht de Ieëre Zoatmaal binne gaon sleipe. Sinds 2 jaor woeën ich same mèt Maud in oos huuske achter oppe Heij.
Ich bin Maud Camp van Ton van Teune Jaer en Keppels Net en van Francien van Sjef van Piete Tieske en Marta van Neule Guul. Ich wirk as vieë-arts bie Dierenartsenpraktijk Ell woeë ich edere daag in mien element bin tösse de bore en de kuuj. In miene vrieje tiêd volleybal ich bie de dames recreante van Stravoc en dans ich bie de meide van Fresh die’tj gae net oppe buun zoogtj shinen. Ich bin òngerdeil van de geweldjige meide van Gein Böl Aan, die’tj gae altiêd veuraan oppe dansvloer kintj vinje.
Wae hebbe hieël völ zin in deze geweldjige vastelaovendj mèt Casper, Sharon, Joris en Ylva.
