Rooj, 9 januari 2026
Wae, Prins Casper 1e.
Gebore op 27 juni 1991 in ‘t zekehoês van Wieërt en daonao gauw bie oos pap en mam ingetrokke in Rooj. Bin de aodste, netste en kleinste zoon van Miriam van Pierre de Bekker en van Mien van Krisjes Zjef, en van Funs van Lotje vanne Fuus oet Ell en van Lies van Kets Graatje oet Ospel.
Bin same mèt mien jònger zus Anouk en mien jònger breurke Joris opgegruudj oppe Teune Smeedstraot. Dao hebbe wae altiêd völ gekuitj en boete gespeuldj mèt de hieël straot, eine fantastische en onbezörgdje jeugd waas det!
Oos Anouk is òngertösse ein echte Amsterdamse, wat ich as Ajacied hieëlemaol neet erg vinj, en oos Joris … det is òngertösse eine echte Zoatmaal gewore zoeë wietj gae kintj zeen!
Mien ieërste raekensomme heb ich gemaaktj oppe Sint Jan en nao de HAVO oppe Philips Van Horne bin ich Commercieel Management gaon studere aan de Hogeschool Zuyd in Zitterd. Nao ein sjoeën roondjreis same mèt Sharon door Argentinië en Chili bin ich aan mien carrière as “Jobhopper” begosj en heb ich ònger angere inne minsehanjel gezaete, koffiemachines verkochtj en rollators ingekochtj bie völ sjoeën en versjillendje bedriêve. Ich bin zelfs nog op eine blauwe maondjig ambtenaar gewaesj bie de gemeindje Wieërt.
Euveral stikse weer get op en mèt al die kinnis, bin ich ein dikke 4 jaor geleje in oos familiebedriêf “Bekkerie Snijders” gestaptj. Dao zwe-ij ich same mèt Mark en Joost al 4 jaor de scepter en die samewirking geit os boetegewoeën good aaf. Ich bin gruuëts op oos team van 36 man. Daag en nacht zètte oos bekkers, winkeldames, bezörgers, sjoeënmakers en fantastische jeugdkrachte zich same in òm de lekkerste bruuëdjes, mik en vlaaie veur uch te make.
Ich bin bekans 14 jaor same mèt Sharon, die ich sinds aafgeloupe zomer ouch officieel mien vrouw maag neume, naodet wae ein fantastische broeloft hebbe gehadj inne hoôf van sjoeënmoder May oppe vloot. Van det fieëst heet volges mich hieël Rooj mèt kinne geniete.
Sharon
Ich bin Sharon, 3 x 11 jaor geleje gebore as lèste oet ‘t rieke van 4, gemaaktj door May van Pierre van Kösters-Door en van Toke van Waale Sjang, en door Jan van Koppe Harie oet Haler-Uffelse en van Mina van Vaore oet Hunsel. Ich bin thoês gebore op de Sint Jozefstraot, ein hoês waat mèt zoeëvöl ambities – zoeëwaal zakelijk as privé – al gauw te klein woôrd. Mien jeugd heb ich doorgebrachtj oppe Lambroekweêg woeë ich same mèt Amanda, Masha en Koen alle plaats haaj òm lekker te speule en ouch aaf en toe ein fieëstje heb gehaoje. Tiejes deze vastelaovendj kinne wae ein emes helaas neet òngersjeije, mer wae wete zeker det oos pap örges mètgeneetj deze vastelaovendj, d’r aaf en toe eine dreenktj en gruuëts is op os as prinsepaâr!
Van oos pap heb ich lieëre òngerhanjele en det keumtj mich good van pas in miên werk as makelaar bie Hermans Makelaars in Wieërt. Fieëstj gae deze vastelaovendj zoeë haard det ‘t daâk d’r aaf geit of passe de vastelaovespekskes neet mieër oppe zolder? Wètj dan dedjer nao de vastelaovendj bie mich terecht kintj veur ein anger hoês of bedriêfspândj.
Casper
Wae zeen al 4,5 jaor gruuëtse aojers van os prachtige dochter Sien die sinds begin dit sjooljaor nao De Firtel geit. Oos hundje Bassie maaktj oos gezin oppe Bergerothweeg compleet, woeë wae òngertösse alweer 8 jaor woeëne.
Naeve al det haard wirke gaon ich 2 kieër inne waek padelle bie de Grensmeppers met ein vast gruupke en organiseer ich ouch aaf en toe ein activiteit as lid van de seniorecommissie. Daonaeve wirke wae met mien band The I.T.’s aan eine spetterendje come-back, mer istj veural ouch eder 2 waeke gezellig muziek make bie os thoês inne muziekkelder. Dae muziekkelder heet de hieël veurberei-jing ouch deenst gedaon as oos Prinse kefeke.
Zoatmaale en Zoatmaalinne,
Bin noê prins bie de gratie van aod prins Stef 1e, Vorst Ruben, de Raod van Ellef en de kepel.
Doon uch wete det:
Ten 1e
De aafgeloupe jaore kostj gae mich oppe boontje aovendj en inne optocht aansjouwe as Drek-prinses,
Mer toen Stef mich in september vroog as Zoatmaaleprins, reep ich voloet YES!
Ten 2e
‘t 65-jaorig jubileum bie de bekker veerdje wae mèt eine ope nacht,
Om 4 oor snachts wore de minse van Rooj nog steeds nao ein gratis stök vlaaj op jacht.
Ten 3e
Ich bin Ruben ziene ieërste prins as vorst,
Ich hoop mer detter weit woeë d’r aan is begost.
Ten 4e
Lucky13… eine fantastische vrinjegroep, mèt mer leefst 13 paar leenkerhenj,
Kiektj straks neet raar op van deze prins bovenop ein platte ker mèt slappe benj.
Ten 5e
Bie Geulenhof keumtj weer laeve inne brouwerie,
Det doon zie mèt ein geweldjig makelaarskantoeër aan heur zie.
Ten 6e
Mien band The I.T.’s hebbe 5 waeke òm zich oet te stökke,
11 vastelaovesleedjes mèt die daag, det mòt toch waal lökke.
Ten 7e
Jaorelank as hoofdleider bie KVW 1&2 mit völ plezeer, zinge en springe,
Gruuëts waas ich wie ich dit jaor oos Sien veur ‘t ieërst mocht bringe.
Ten 8e
De bandj tösse mien prinses en oos sikkendante is òntstange tösse de aerpel en de frikkedelle,
Jaorelânk hebbe ze bie Stuf same staon kokkerelle.
Ten 9e
Big Benny vònj ‘t destiêds völ te zieër,
Manne van Six-Pact, nao 8 jaor maag de hieërezitting toch weer eine kieër?
Ten 10e
Alweer 2 meuskes mèt ein möts op, hieëremins minsgenaoje
Tis waal dudelijk det die van vastelaovendj vere haoje.
Ten 11e
Die bekkers van os, det zeen pas kampioene van de nacht,
Veur de 4e kieër sleipdje wae de titel bèste Vlaaibekker in de wacht!
Zoatmaale en Zoatmaalinne,
Hiê geitj gebeure, jao hiê isj te doôn,
Paktj oet mèt verklei-je en loup veur de joeks ins op hakkesjoôn,
Dootj lekker mèt en òmerm ederein dae deze vastelaovendj wiltj belaeve,
Sjötj de glaze vol en zingtj lekker mèt os mèt, muziek det kleurtj oos laeve…
Want same is völ sjoeëner dan allein, deze vasteloavendj is veur ederein!
En det alles ònger mien devies:
Vastelaovendj,
Keumtj veur de bekker!
