Prînsepaâr 2024

Proclamatie Prins Ruben 1

Rooj 12 januari 2024,

Wae Prins Ruben 1en prinses Jasmijn,

Gebore op 4 mieërt 1994 as zoon van Henk van Harie van Lemme Harie en Mien van Antje oet Itter. En van Marjolein van Aldje van Kösters Chrisje en Sjra vanne Sjruur oet Èll. Same mèt mien aojer zus Stefanie bin ich opgegruudj oppe Bokkestraot en vanaaf de tiêd det ich opstap mocht goan woeëndje wea oppe Walestraot. Ein hoes achter de bar is vrieët henjig kan ich uch vertèlle.

Bin via basissjool Sint-Jan en ’t College in Wieërt oeteindelijk oetgekomen op de HEAO in Sittard, hoedet ich commercieel management heb gestudeerdj. Naodet ich mien HBO-diploma haaj gehaaldj, vonj ich mien eige slum genogt en bin ich beginne te wirke. Det wirke doon ich al bekans 8 jaor bie aafvaldienstverlener en -verwirker Renewi. Als sales engineer probeer ich onger angere de bedriefsprocessen te verbeatere bie oos bestaondje klantje en draag ich daoneave oug mien steinke bie asj geit om’t binnehalen van noewe klantje.

11 jaor geleje heb ich op’t prinsebal van de Zoatmaale mien vriendin Jasmijn bie-ein gedaon. Ut kan geine toeval zeen det ze dea aovendj oug ein prinsessen kruuënke oppe kop haaj. Inmiddels woeëne wea alweer 3 jaor samen oppe Parklaan, oug waal beater bekindj als de ‘Partylaan’. Jasmijn is de middelste dochter van Roland van Henk en Anne-Marie Gertsen oet Tilburg en van Eveline van Pierre en Mien vanne Bekker. Daoneave heet Jasmijn nog ein aojer zus Fleur en ein jonger zusje Merel. Jasmijn is sinds ein aantal jaor mede-eigenaresse van kinderdagverblijf Hupsakeee! ane groeëte weeg. De meiste van uch zullen heur roeëd fietske dao oug waal dèk zat hebben zeen staon.

Same zeen wea lid van de sjoeënste vastelaoves en vrinje groep van Rooj, V.V. de Dikke Snul. Eine vreiselijk gezellige groep dea altied vanne partie is als  in’t dörp get te doon is. Auch heet Jasmijn nog eine vrieët gezellige vriendinnengroep dea euveral te vinje is. Same mèt al oos vrinj maken wea d’r mèt de vastelaovendj altied ein groeët fieëst van.

Op zonnig bin ich meistal te vinje oppe Steinakker. Door mien slechte kneuk helaas neet mier om zelf te voetballen, mer waal als leider van Brevendia 2. Om eavegood nog ein bitje fit te blieve houw ich gear ein belke op de padelbaan. Ut is dan oug ein gooj zaak det wea hieveur neet mier boete Rooj hove te gaon, daoveur heb ich mich dan oug ingesjreve bie de Grensmeppers.

Bin noe prins biej de grasie van aod prins Stan 1e, Vorst Geert-Jan, Ieërevorst Frank, de Raod van Ellef en de Kepel.

Doon uch weten det:

Ten 1e :

Toen ich bie Renewi begost mèt wirke, waas de ieërste vraog die ich kreeg van mien collega’s: Dan zuls dich toch ouch waal ins prins weare? Want nao Frank, Roel en Erik bin ich noe de 4e dea hie steit mèt de muts en veare.

Ten 2e:

Mochtjer mèt de vastelaovendj eine sjoeëne nacht beleave en weartj d’r nao 9 moandj eine kleine gebore? Gein zurg, gea kintj mèt die daag nog gewoeën noa’t Café, bringtj’m noa Jasmijn bie Hupsakeee!

Ten 3e

Det ich gruuëts bin op mien sikkendante Guus en Bart. De aafgeloupe maondje zeen ze dèk wakker gesjrokke, om ut feit det ze hie oppe bühne zoje staon. Doaneave oug nog ein weurdje veur eine volle zaal, det hebben ze toch kei good gedaon.

Ten 4e

Noe Bart hie neave os steit as sikkendant, zeen d’r bie de Maroy Bar nog get geatjes, is d’r missjien nog emes dea in zien plaats kan helpen bie ‘t aanslaon van de veatjes?

Ten 5e

In mien jaor als jeugdprins wiste de wagenbouwers eine sjoeëne wage te bouwe in de stijl van Hoube Dre. Ut zooj toch kei ruig zeen as die zich weer bie ein pakke en speule in mien stamcafé.

Ten 6e

Dit jaor bouwtj De Berg heure liste groeëte wage, hopelijk komen d’r anger vastelaoves groepe hoedet ze ut stekske aan euver kinne drage. Om te kinne bouwe is ein bouwplaats cruciaal, mocht ein van uch hie bie kinne helpen? Dan is det veur die groepen ideaal.

Ten 7e

100 joar Brevendia, wat hebben wea genoten.

Samen mèt hieël Rooj hebben wea ‘t seizoen mèt ein geweldjig fieëst aafgesloten.

Ten 8e

De wege in Rooj liggen al maondje oop, euveral zuuse koele en gate. Volgesmich zeen ze ein noew smokkelroute aan’t grave en det heet nemes in de gaten.

Ten 9e

Mèt de boontje aovendj artiesten ongerling, hebben wea eine vrieët sjoeëne groep. Wea make vul plezeer en d’r weartj vul gelachen, nea det is zeker neet mis. De hamvraog blieftj allein, bie weem is maondjig de afterparty tot ein oor of zès?

Ten 10e

Un deil van dees veurbereidingen hebben wea in Zuid-Afrika getroffen. In ‘t zunke en tussen de wildje bieëste naodeenke euver de vastelaovendj, det waas pas boffen!

Ten 11e

V.V. De Dikke Snul, de gezelligste en sjoeënste groep van Rooj. Vastelaovendj veere doon wae mèt z’n alle én tegooj!


Zoatmaale en Zoatmaalinne,

Ut doortj neet hieël lang mier, en ut sjoeënste fieëst van ut jaor geit weer beginne. Ein van die sjoeën dinger van de vasteloavendj is desse  3, 4 of soms waal 5 daag same bis mèt al dien vrinj. Vrinj die desse bekans edere weak zuus, mer oug vrinj die desse mesjien get minder zuus. De vastelaovendj zurgtj d’r veur det ederein weer truk noa Rooj keumtj om same vastelaovendj te veere. Ich zeen dan oug gear det alle groepe same oppe bein zeen en det wea d’r mèt zien alle ein geweldjig fieëst van maken.

Haaltj de komende weake alles oet eure agenda en zurgtj det dea vol keumtj te staon mèt de Vasteloavendj in Rooj! Euveral hoedetj mèt die daag te doon is, volle bak! En tegooj!

En det alles onger mien devies:

VASTELAOVENDJ VEERE MÈT DIEN VRINJ,

SAME TOT AAN ‘T INJ!

Alaaf!