Ich bin Zoë Vaessen, dochter van Noortje van Jan van Lempens en Rina Cuijpers. En Enrico van Toos van Schaeken en Pietje vanne Hoop. Ofwaal, van dae trainer van ‘t ieërste van Brevendia.
Ich bin gebore op 30 september, maondjigaovendj mèt Wieërt kermis. Ein gekkehoês inne stad, mer gelökkig lete ze mich hieël snel nao de Prinses Marijkestraot in Rooj gaon.
Van dao oet bin ich 8 jaor lang te voot, met hieël völ plezeer, nao de Doeëzendjpoeët moge gaon en gaon noê oppe fiets nao ‘t College in Wieërt; det is get mieër aafzeen.
Ich bin 3 daag inne waek mèt mien vriendinne inne sporthal te vinje òm te handjballe in ein super gezellig team. Daonaeve dans ich nog eine daag inne waek bie Fresh.
As d’r get in ‘t dörp te doon is, doon ich dao gaer mèt mien vriendinne aan mèt. Ich vintj den ouch hertstikke ruig det d’r in Rooj zoeë völ georganiseerdj weurtj.
Dit vastelaovendjseizoên wil ich gaer same mèt uch herinneringe veur het laeve gaon make. Laote wae d’r van gaon geniete, same!
