Jeugd Prînsepaâr 2024

Proklamasie Jeugdprînsepaâr 2024 Lucas & Liv,

Wae, Prins Lucas,

Aodste, slumste, innigste en veural knapste zoôn van Andy van Piet van Sjoemaekers Lei en Antoinette van Theu van Trienen oet Bieësel,

en van Monique van Albert en Mieke Kisters oet Wieërt.

Ich bin gebore op 17 november 2010 in ‘t zekehoês van Wieërt. Ich heb nog ein jòngere zus Merel woeë ich supergruuets op bin en hieël völ van haoj.

Wae hebbe völ plezeer same en staon regelmaotig same te danse en te zinge inne kamer, mer steggele det kinne wae ouch hieël good.

Ich woeën op de prinses Beatrixstraot 1 tegeneuver de Bar in Rooj centrum. Det is henjig as ich straks 18 bin, want dan kan ich kroependj heivers.

Ich heb ein aquarium mèt sjoeën vèsse, wae hebbe eine hamster Sammie en eine hieële leve hoondj Charlie.

Ich gaon veur ’t ieërste jaor op ‘t fietske nao Het College Weert en bin al good gewindj.  Mer dju wat mòtte we dao haard wirke en det geit allemaol ten koste van miene vrieje tiêd.

Ich haoj super völ van voetbal. Ich zit bie Brevendia en mòt mich dao flînk were tege al die groeëte tegestenjers.

Ich veul mich dan sòms net zoeë klein as Messi. Ajax is mien club, ouch as het effe tegezitj!

Mèt oze vrinjegroep De Klutsbeare hebbe wae ‘t altiêd erg gezellig same. Veurig jaor hebbe wae veur de ieërste kieër aan de optocht mètgedaon

en zeen we d’r geliêk vandoor gegange mèt de ieërste priês. De Ieëre Zoatmaal ging helaas aan oos naas veurbiê, want daomèt ging os Merel  heure vriendinnegroep

– dik verdeendj – vandoor. Gae snaptj neteurlik waal, det ich det lang heb mòtte aanhuuëre.

Wae, Prinses Liv,

Ieërste, groeëtste en verstenjigste dochter van Jeroen van Peter van Kauwe Lei en Petra van Olle Miet, en Kelly van René van Hostert Sjaak en Maria van Klauwers Harie.

Ich bin op 8 mei 2011 as Zoatmaal gebore in ‘t zekehoês in Rooj-Noord. Ich heb nog ein jònger zõster Fem, die mich altiêd aan ‘t lache maaktj. 

Mer noê maak ich heur aan ‘t lache. Verder heb ich nog eine hieële leve hoondj Nox, woeë ich ‘t leefst de hieële daag mèt knuffel.

Doordewaeks fiets ich ònger angere mèt miene Prins Lucas, Adjudant Lars en Adjudante Lara nao Het College Weert, woeë ze os nog get aan ‘t verstandj probere te kriege.

Regelmaotig bin ich te vinje oppe tennisbaan bie de Grensmeppers. Dao houw ich gaer ein belke euver ‘t nèt mèt mien vrinj en bin ich herfstkampioen gewore mèt mien team.

Ouch zit ich same mèt eine hieële leuke groep in de Jeugddörpsraod. Dao zèt ich mich in òm leuke activiteite te verzinne en te organisere veur de Roojer jeugd.

Ich kom mesjien euver as ein röstig maegdje, mer geluif mich… Sjiên bedruugtj. Want as d’r ein fieëstje is, staon ich as ieërste oppe dansvloer en zèt ich de tent oppe kop!

De vastelaovendj is mich mèt de paplepel ingegote. Verklei-je, schminke en danse op vastelaovesmuziek is woeë desse mich gelökkig mèt kinst make.

Roeëd, gael en greun is wat de klok sleit mèt dees daag!

Lucas en ich gaon os hieël gaeve de komendje tiêd, en wae hope d’r same mèt uch ein knalfieëst van te make!

 Wae doon uch wete, det:

Ten 1e –          Liv is al mien vriendin van kleins aaf aan,

deze vastelaovendj gaon we d’r same tegenaan!

Ten 2e –          Lara en Lars as Adjudante en bèste vrinj,

same door tot ‘t inj!

Ten 3e –          Mèt Lance as Jeugdvorst en groeët leefhebber van koke, drinke en aete,

gaon wae dees daag vanalles oetvraete.

Ten 4e –          Effe geine TikTok,

Vastelaovendj sleit de klok!

Ten 5e –          Ich haoj van game, same mèt oos pap,

mer deze vasteloavendj gaon wae same flink op stap.

Ten 6e –          Mien zusje Fem en ich gruje wie hop,

wae kieke os mam al bekans oppe kop.

Ten 7e –          Frikkedelle zeen veur mich legendarisch,

dorròm waer ich neet vegetarisch.

Ten 8e –          Gemeindje Wieërt wirktj toch ins mèt,

Zèktj noê zelf…. eine Grand Prix in Rooj det is toch vèt?!

Ten 9e –          As klutsbeare haoje wae van chille,

mer mèt deze vastelaovendj gaon wae de vloer flink laote trille.

 Ten 10e –       Jeugdprinsewage-bouwers völ succes,

ich zit gaer werm en druueg wie ein echte prinses.

Ten 11e –        Jeugdraod pastedGraphic.png“kom noê en fieëst mèt os,

wae gaon hiê hieëlemaol los”pastedGraphic_1.png

Zoatmaelkes en Zoatmaalinnekes,

Wae hebbe d’r kei völ zin in en same mèt uch zètte wae de tent oppe kop.

Lekker oet dae bol gaon, danse, zinge en springe, det is toch top!

Dus zeetj vanne partiej en gaotj knalle,

En laotj oze Roojer vastelaovesmuziek door de straote galle!

Verklei-je, schminke, laeftj uch hieël oet,

Deze boontje trein geit knal-haard vroet!

En dit allemaol ònger oos devies,

Ane kântj mèt die balle, wae gaon kei-haard knalle!

ALAAF!