Proklamasie Jeugdprînsepaâr Sien en Twan
Wae, Prinses Sien,
Gebore op 8 november 2012 in ‘t zekehoês van Wieërt. Toen wiste ze al det de Vastelaovendj in mien blood zitj. Want ich waas nog mer ein paar daag aod en kreeg al ein fieëstmöts op miene kop.
Ich bin de aodste, leefste en rustigste dochter van Geert-Jan van Dorrie van Jan & Truus Fleuren en van Graadje van Sjoemaekers Sjang en van Mariëlle van Peter van Pierre Zoes oet Wieërt en van Tilly Vestjens oet Hunsel.
Ich heb ouch nog ein zusje Cato die noê waarsjienlik door ‘t daak nao boete is gegaôn.
Ich vinj ‘t leuk òm mèt heur te kuite, mer astj mis geit heb ich niks gedaôn.
Dees Prinses woeëntj in heur kestieël op Lewieze woeë noe veur ‘t ieërst de lempkes borre.
In miene vrieje tiêd kinse mich vinje in de sporthal bie HV Stramproy woeë ich prebeer d’r get bel in te goeëje. As ich dao neet bin, bin ich waarsjienlik te vinje bie Fresh. Dao oefene wae òm later oppe Boontje Aovendj te konne knalle. Verder staon ich gaer inne keuke òm te bakke mèt mien Adjudante Merel. Dao naeve gaon ich gaer skieje. Zoeë kei haard òmlieëg, fantastisch! As ich dan nog tiêd euver heb, gaon ich nao de Philips in Wieërt.
‘t Vastelaovend blood heb ich van gein vreemdje. Os pap en mam zeen in 2016 Prinsepaâr gewore en sinds dae tiêd bin ich d’r altiêd biê. As ich nao hoês most kos ich det meistal neet waardere… Mer deze Vastelaovendj gaon wae neet heivers.
Same mèt mien vriendinne loup ich al hieël get jaor de Wichter Optocht, woeë wae as bieëldjige maegdjes de Ieëre-Zoatmaal hebbe gewònne. Meide, ich vinj ‘t kapot ruig det wae deze hieële Vastelaovendj WEER same vere. Inne jeugdraod, as Jeugdvorst, Adjudant en as Prinses.
Wae, Prins Twan,
Knapste, leefste en bienao henjigste, oh jao… ouch einige zoôn van Eric van Bert van Bakkes en Mientje van Ziebes en van Marian van de post oet Itter.
Ich bin 8 waeke te vreug gebore op 4 december 2012 in ‘t zekehoês van Wieërt. Jao, ich woeëj ouch kedootjes van Sinterklaos. Nao 3 waeke logere mocht ich op kerstaovendj nao hoês. Mer, det kwoom pap en mam neet zoeë good oet. Mien zus Gwen most optraeje bie de kerstmusical van de scouting inne Wel. Gelukkig waas d’r ein verpleegster oet Tungelder die det begreep en ich mocht nog eine nacht blieve slaope. Oeteindelik bin ich as kerstkindje thoês gekome oppe Weekershof.
Mèt mien zus Gwen kin ich ‘t good vinje. Wae gaon geregeldj same op stap. Dan betaaltj ze alles, wat waal henjig is. Wae hebbe ouch ein hundje, Zelda, woeë ich gaer mèt knuffel.
Same mèt miene Adjudant Vigo fiets ich edere daâg braaf nao ‘t College. Dao doon ich aaf en toe ein bitje mien bèst. Eine kieër in de waek prebeertj Tijn mich ‘t tennisse te lieëre, wat neet altiêd löktj, want same mèt Tim hebbe wae ‘t erg gezellig. Op vriejig gaon Vigo en ich mèt ein gruupke nao scouting in Tungelder. Hiê is ‘t altiêd baere-ruig.
Wae gaon d’r os noê hieël veur gaeve òm d’r eine ònvergaetelikke Vastelaovendj van te make.
Doon uch wete det:
Ten 1e
As 1e prinses van groep 1 heb ich ‘t al kònne lieëre,
Kleuters van de Firtel, blieftj fieëste en haotj ‘t veural in ieëre!
Ten 2e
De wages van d’Echelsteveur en de prizzentasie van De Leknaze, ein Ieëre Zoatmaal-combinatie!
Zörgtj gae dit jaor same veur ein sensatie?
Ten 3e
De Mooshoofpaadzengers prebere de Roojer jeugd al hieël lang ‘t plat biê te bringe,
Mèt ein kleindochter as prinses zal opa Geer noê waal gruuëts get van heur leedjes zinge…
Ten 4e
Scouting is wie Vastelaovendj in ‘t bos,
Edere vriejig gaon wae dao hieëlemaol los!
Ten 5e
Juf Sophie is mèt verlof, weem mòt os noe lieëre danse?
Gelökkig beetj de polonais veur ederein waal kanse!
Ten 6e
Ouch Jeugdvorst Zoë en Adjudante Merel en Vigo gaon d’r hieël veur,
Mèt z’n viêve gaeve wae deze Vastelaovendj kleur!
Ten 7e
De Steinakker richting de beêk, det maaktj os blie,
Dan kriêge De Grensmeppers en HV Rooj d’r ein hieël stök biê!
Ten 8e
KVW weurtj weer de op ein nao ruigste waek van ‘t jaor,
Want d’r staon ein paar noew, enthousiaste, slum en sterke poste klaor!
Ten 9e
Tiejes de greppeltocht sjròkke wae os ein paar kieër kepot,
Jeugddörpsraod, gaotj zoeë doôr en laotj de groeëte mer es kieke wie ‘t mot!
Ten 10e
Mèt die daag neet appe en snappe, mer steurtj kaarte en breve. Maaktj ‘t mer boontj.
Oos mam fietstj zoeë gruuëts wie eine pauw ‘t hieël dörp roondj.
Ten 11e
Vorst Ruben, maak dich mer neet drök,
Asj echt vandoon is keumtj oos pap nog waal ein paar daag trök!
Zoatmaelkes en Zoatmaellinnekes,
Mèt ein Leknaas ein eine van d’Echelsteveur veurop,
Geit ‘t Zoatmaale-peliês hiê oppe kop!
3 daag gein kampveur, marshmallows, cupcakes of handjballe,
Wae gaon same fieëste en knalle!
Verklèdj uch as clown of schminktj uch as bieëst,
Dan weurtj ‘t in Rooj weer ein groeët fieëst.
En det alles ònger oos devies:
Gaeftj gaas, gaotj los,
Veertj Vastelaovendj same mèt os!
Alaaf!
