Jeugd Adjudantepaâr Linn & Tuur,
Ich bin Linn Timmermans
Bin gebore op 2 februari 2010. Ich bin dan waal in Wieërt gebore mer ich bin toch ein echte Zoatmaallin(n).
Ich bin de aodste dochter van Bjorn van Jacques vanne Spêltj oet Haler en Truus oet Itter en van Yvonne van Math van Koleboor oet Thoeër en Toos van Meiese. Mien klein zusje hètj Sofie en die zal noê waal stuiteren van bliedjsap! Thoês zitj oze hondj Bowie, dao zulle we dit jaor toch ouch ein vastelaovendjspekske veur mòtte make.
Door de waek fiets ich same mèt mien vrinj nao de Philips.
Mien hobbies zeen:
Handjballe bie HV Stramproy mèt ein paar gezellige vrouwluuj en trainers.
Bakke doon ich hieël gaer. Taart, cupcakes, waofels, metseltaart en cake make same mèt oma. En dan mèt z’n allen gezellig same preuve nateurlik.
Knutsele is ouch ein van mien hobbies. Kaertjes make, slingers en fotobeuk.
Ich waas gruuëts det ze mich vroge òm adjudante te waere en vinj ‘t sjiek det wae dit jaor same weer gewoeën vastelaovendj kinne vere.
ALAAF !
Ich bin Tuur Palmen,
Jòngste, netste en slumste zoon van Paul van Eed van Keune Leike en Linny vanne Boor oet Èll en Maureen van Wiel van Dreiers en Truus van Piet Snijkers oet Itter.
Ich bin gebore op 17 juli 2010 in ‘t zekehoês van Wieërt, precies 3 jaor nao miene broor Sten.
Ich woeën al 12 jaor op de sjoeënste straot van Rooj; bove oppe Berg. Ein sjoeën en aktieve buurtvereiniging.
Sinds ein half jaor gaon ich edere daag mèt de fiets nao ‘t Kwadrant in Wieërt, woeë ich gaer mèt mien henj wirk op de Techniek-opleiding.
In miene vrieje tiêd haoj ich van voetballe in de JO13-1 van Brevendia. Daonaeve speul ich gaer ein nuuëtje muziek bie de jeugdfomfaar en op zònnigmörge gaon ich dèk mountainbike in de Tungelderse Wel en ’t Fluppe Böske. En det sloête wae gaer aaf mèt eine waofel bie ’t Vossevin.
Op zaoterdig gaon ich gaer get biêverdene bie de groeëtste hinneboor van Wisbrook en òmstreke; Ad Verkennis. Ich help dae mèt eier rape, eier-automaat biêvölle, oppe loader roondjrieje en nog vanalles.
Jao ich bin eine echte Remmel! Sinds veurig jaor hebbe wae mèt oos vrinj dan ouch eine vastelaovendjsgroep: De Remmels!!
En daonaeve gaon ich gaer mèt de Plekduvels kampere bie de Geitewei van Thei. Sinds veurig jaor bin ich zelfs gebombardeerdj tot Theike van ’t Geiteweike.
Vastelaovendj vere zitj mich echt in ‘t blood want de Palme-express dreitj al jaore op volle toere.
ALAAF !
