Zoatmaal van Verdeenste

 

Vriedig 10 januari 2020 is tiejes de ieërste Boontje Aovendj van v.v. De Zoatmaale pestoeër Notermans beneumtj tot ‘Zoatmaal van Verdeenste’! Ut is ein ongersjeijing die weurtj toegekèntj as waardering veur alles wat eemes heet beteîkendj of nog beteikentj veur de Roojer Vastelaovendj. Det kan ein individu, ein koppel of zelfs eine hieële groep zeên. De Zoatmaale vinje ut belangriêk en sjoeën det völ minse in os eige Rooj bezig zeen mèt de Roojer Vastelaovendj en zich inzètte veur de Roojer Vastelaovendj.

 

Pestoeër Notermans waas in Rooj de aafgelaupe 23 jaor eine pestoeër dae brugge woej bouwe, verbinje. Hae haaj al snêl in de gate det Rooj ein hechte gemeinsjap is, mèt ein druk vereinigingslaeve. Zien eige devies waas: ‘In Rooj keumtj alles tegooj’. Hae staong altiêd midde in ut durp en in ut vereinigingslaeve. Ein paar klein veurbieëldje: Wae dinke mèt hieël vul plezeer truk aan zien optraeje op de Boontje Aovendj, hoeë hae jodelendj de berg aaf kwoom. Of zien deilname aan de optocht, hoeë op ein lollige meneer de veurdeile, mer auch de naodeile van ‘auto-deile’ onger de aandacht woorte gebrachtj. Pestoeër Notermans waas d’r altiêd biê, en wae koste altiêd op hum raekene. Ein van de hoeëgtepuntje is eder jaor de opening vanne Vastelaovendj. Mèt vul humor wist hae altiêd de juuste Vastelaoves-toeën te zètte. Eine kolderieke preek, mer waal altiêd mèt ein boeëdsjap. Wae opendje de vastelaovendj same en ginge hum mèt eine polonaise in!

 

De rol van de kèrk is de aafgelaupe 23 jaor behueërlik verangertj. Mer ein dink is zeker, in Rooj haoje wae lètterlik en figuurlik de kèrk nog steeds inne midde. Verbinje is dao-in ut toverwoord. Daodoor heet de kèrk nog steeds ein belangrieke rol in de Roojer gemeinsjap.

 

De aafgelaupe 23 jaor heet pestoeër Notermans op zien eige meneer hieël vul veur Rooj en de Roojer Vastelaovendj beteikentj. Wètj minse te enthousiasmere, biej-ein te bringe en te verbinje! Mèt humor, mer auch zeker door mèt regelmaot ein bitje boete de lienkes te kleure. Op ut rendje, mer altiêd mèt respect veur ederein. En det is auch precies wat Vastelaovendj is!

 

As bliêk van waardering veur zien groeëte biêdrage aan de Roojer Vastelaovendj hebbe De Zoatmaale pestoeër Notermans op vriejig 10 januari 2020 tiejes de Boontje Aovendj beneumtj tot ‘Zoatmaal van Verdeenste’.

 

v.v. De Zoatmaale

X