Home > Sikkendantepaâr 2019

 

 

 

 

 

 

 

 

 

Daag Zoatmaale en Zoatmaalinne,

Ich bin Stefan Seems aodste zoon van Leo Seems oet Susteren en Elly Maes van Sjaak van Sjoteles Sjang. Bin gebore op 11 juni 1988 in het zekehoês van Remunj en bin vervolges same mèt mien breurke Tomas opgegruudj ane groeëte weêg op de Fransstrouxstraot 61 in Rooj.

Same mèt mien vriendin Marijn Weekers woeën ich al bekans 4 jaor oppe Prinses Margrietstraot. Marijn is de aodste dochter van Erik Weekers van Klemme Sjaak en Marleen Hendrikx van Lemme Harry. Ze is gebore op 23 september 1992 in Rooj en klein gebleve op het Weekershof samen mèt heur zösterkes Jilke en Fleur.

Ich wirk ruum 3 jaor as autosjaaj-herstèller en spuiter bie Van Mossel in Wieërt.

Daonaeve bin ich actief bie de vriewillige brandjweer in Rooj, mer mèt de vastelaovendjsdaag zulle die anger brandjweermen het toch efkes sònger mich mòtte doôn.

In miene vrieje tiêd klus ich gaer aan auto’s en aan miene Americaan en mèt good waer maak ich eine tour op miene motor. Ouch drei-j ich same mèt Marijn as lei-jing edere vriejigaovendj eine geweldjige scoutingroep.

Marijn wirktj as zakelik adviseur bie de Rabobank in Wieërt, woeë ze zich dagelijks bezig hèltj mèt het advizere en financiere van MKB bedriêve in deze regio.

Mèt de vastelaovendj make Marijn en ich d’r altiêd ein fieëstje van. Ich mèt miene vrinjegroep Ram Ane Pin, dae dit jaor 11 jaor besteît, en Marijn mèt heure vriendinnegroep de Heite Toeëje.

Wae vinje het geweldjig òm same mèt Prins Jop I en prinses Pam de vastelaovendj in Rooj veurop te gaon. Same mèt alle Zoatmaale en Zoatmaalinne gaon wae d’r eine fantastiese vastelaovendj van maken.

Alaaf!