Rooj, 10 januari 2020,

 

Wae, Prins Sten 1e en Prinses Loes,

 

Bekans 26 jaor geleeje geboren as jongste zoon van Pedro van Jozef van Leeje To en Leppers Fien en Marjo van Meerester Wum en Nellie vanne Hoof. Opgegruudj en groeet gewoore oppe Meuleweeg. Woe ich samen mit miene broor Wesley os pap en mam dék zat slaopeloze nachten heb bezurgdj. Mer belangrieker nog, woe we auch samen de allersjoenste tieje hebben belaefdj.

 

Woort as piske nao de Willibrordussjool gesteurdj woe ze hebben geprobeerdj om mich het ein en het anger aan én aaf te liere. Via de middelbare in Wieert en het Summa College in Eindhoven, bin ich oeteindelijk slum gewoore op Zuyd Hogeschool in Haerle. Hie bin ich aafgestudeerdj as werktuigbouwkundige. Dit bring ich noe dagelijks in de praktijk op de teikenkamer bie CPS. As ze vreuger gezagdj haaje det ich mit het fietske kos gaon wirke, haaj ich hie drek veur geteikendj.

 

Heb neugen jaor geleeje op aodjaorsaovendj bie de Willie bar mien maedje Loes opgelaaje, aodste dochter van Thijs van Ziebes Wielke en Leen en Gertie van Kinnester Teng en Mertens Trui oet Haler. Omdet we de aafstandj tussen Wisbrook en de Hei meug begoste te waere, hebben we os veurig jaor ein huuske gekochtj op de Horsterweeg, woe we noe sinds 2 maondj samenwoeëne.

 

Wae zeen allebei lid van ozze vrieet gezellige vasteloavendjgroep Nog Neet Genog en vrinjegroep De Dikke Snul. Samen zeen we standaard vertegenwoordigdj op eeder vasteloavendjsfieestje en doon we steevast mit aan de optocht. Omdet ich eine wagen bouwen zoe sjoeen vinj, bouw ich auch eeder jaor mit bie de Jeugdprinsewagen.

 

Bin noê Prins bie de grasie van aod Prins Jop 1e, Vorst Geert-Jan, De Raod van Elf en de Kepél.

 

Doon uch weten det:

 

Ten 1e            Toen aod-Prins Jop mich in september vroog,

hoofdje ich neet lang nao te dinke

As aod-buren hebben wae al dik

samen de glazen laote klinken

 

Ten 2e            Dit jaor staon we mit ein stel extra op de bühne,

weem haaj det gedachtj?

Keeze waas neet te doon,

dus zeen we neet mit zes mer mit acht

 

Ten 3e            Om te veurkomen det os sikkedanten

eeders kier om het slegtersmutske motte loten

Hebben ze ein muts mit vaere,

en kiek us, ze zitj as gegoten

 

Ten 4e            In 2004 mocht pap as Pedro 1e

mien muts en mantel alvast werm haoje

Det ich hie 16 jaor later moog staon as noewe telg van de Zaotmaale-familie, weem haaj det kinne raoje?

 

Ten 5e            Vv De Dikke Snul: sjoen det 2 groepen zich bieein pakken,

eine groete kliek

Mit 30 man waerdj dae prinsewagen

ongetwiefeldj kei sjiek

 

Ten 6e            Fantastisch wie KVW al jaorelang

de wichter witj te amuseren

Ich bin er dan auch gruuets op det ich komendj jaor

mien 11-jaorig jubileum moog veere

 

Ten 7e            Nao 2 jaor bin ich weer

aan ut voetballen gegaon

Gae snaptj det ich veurluipig

boetespel zal staon

 

Ten 8e            Nateurlijk is Wisbrook

er auch weer bie

In eur 50e jubileumjaor

levertj gae de derdje prins op rie

 

Ten 9e            Machines laote inpakken

is mien specialiteit,

Mer mit vasteloavendj

isj oetpakken woe het om geit

 

Ten 10            Mit die daag moog ich

ein deenk hopen

Blieve de cafees neet korter

mer juust langer open

 

Ten 11e          Geweldjig det de leedjesaovendj

dit seizoen weer op ‘t programma stong

Sjoeen om te zeen wie eederein

oet volle borst mit zong

 

 

Zoatmaale en Zoatmaalinne,

 

Ut is weer zoe wieet, de sjoeenste tied van ut jaor

Liktj de liste handj aan uch pekske en hang het vast klaor

Dootj mit os mit aan de optocht, paktj uch bie ein

Trektj door de straote, jonk en aod, groet en klein

 

Sjuuftj uch verplichtingen aan de kantj

En springtj mit os royaal oet de bandj

‘Nog eine en dan de liste’ zal dik klinken

Euver murge hoove we vandaag nog neet noa te dinke

Samen de vasteloavendj veere, det steit veurop

Dus zetten wae de komendje tied ‘t durp oppe kop

 

Lach haard, geniet vul, zing vals, dans wie eine baer en komtj mit os mit

Samen gaon wae dit fieest veere, tot het inj van de rit

 

Dit alles ònger mien devies:

 

Vastelaovendj, niks aan de kop

ein groeet fiest, non-stop!

 

X