Home > Prinsepaar 2018

 

 

Rooj, 12 januari 2018

Wae, prins Guido I,

Bekans 32 jaor geleje as aodste zoon van Thei van Matje vanne melkfabriek en Mieke van Kùppes Sjaak gebore oppe Amentstraot. Van hiejoet verhoêstj nao de Gouverneur Houbenlaan, woeë ich bin opgegruudj mèt oos Angele en Rens, die nao get gekrijt inne kinjerjaore hieël gooj vrinj van os zeen gewore.

Bin via de Sint Jansjool en ut College oet gekome oppe HAS in Den Bosch woeë ich ‘dier- en veehouderij’ heb gestudeerdj. Nao de vastelaovendj begin ich as kwaliteitsmanager biej Oakfield Champignons, mer tot dae tiêd riej ich veur mien werk nao Bergs Advies in Heytse. Dao bin ich bedriefsadviseur veur de verkushaojerie. Dus Frank, hebste advies vandoon veur de Zoatmaale, dan staon ich dich gaer biej

Tiejes de vastelaovendj van 2003 heb ich mien prinses Susanne lieëre kinne. Susanne is de aodste dochter van Koos van klinge Tjeu en Petra van Thuijl oet Ospel.

Wae woeëne noê ruum 9 jaor same oppe Prins Clausstraot, tegeneuver de berg op ut zeskampterrein. In november 2016 zeen wae dao gruuëtse aojers gewore van oos dochter Janne.

Mètdoon aan de optocht is aan os allebei waal besteedj, want neet allein met vastelaovendj, mer ouch met de dörper sjutte trekke wae regelmaotig door de straote.

Vanaaf de oprichting bin ich huidbaer van de Zeiverlep, eine sjieke vrinje-groep, woeë-mèt wae al veur de 18e kieër vastelaovendj veere.

Ich bin noê prins bie de grasie van aod prins Danny I, Vorst Frank, Ieërevorst Tjeu, de raod van Elf en de kepel.

 

Doon ich uch wete det:

Ten 1e
in 1999 mocht ich as jeugdprins de Rojer jeugd veurgaon.
Ich vintj geweldjig det ich noew as groeëte prins veur uch maag staon.

Ten 2e
Op de sjöttewei is ‘t mèt Koen en Anouk meistal raak
Met heur as sikkendantepaar gaon wae rojaal oet oos daak

Ten 3e
Roojer minse en vereiniginge, bedanktj veur waatj gae veur os hebtj gedaon.
Want allein met samewèrke konne de Zoatmaale 6×11 jaor bestaon.

Ten 4e
Ongeluifelik waat Rojer vriewilligers al zoeë lang prestere.
Door uch is KVW al 50 jaor ein begrip, dét zulle wae veere.
Ten 5e
Miene allerieërste optocht heb ich mèt de buurt van Wisbrook geloupe.
Dus dit jaor neet metdoon, kintj gae echt neet verkoupe.

Ten 6e
Veur de 2e kieër Limburgs kampioen vlaai bakke, en Joost luiptj nog steeds neet naeve zien sjoon.
Hae zal noew toch waal ut Zoat-Kermelke in de aanbeejing doon!

Ten 7e
Zinge veur de jeugd op t jeugdprinsebal is hieël neet verkieërdj.
Vastelaovendj veere weurdj hiej namelik van jongsaaf gelieërdj.

Ten 8e
As lid van de volhaojers heb ich regelmaotig wie men zeet ein mombakkes op.
Ondanks det ich noew efkes neet mètdoon, weurdj tenieël ouch dit jaor weer top.
Ten 9e
Met 2 Ongerein zinge wae dit jaor veur de 11e kieër ein nummer veur ut publiek.
Juust dit jaor verzintj Robbert de titel  ‘hae is de prins’….. de’s pas sjiek
Ten 10e
Met de Zeiverlep in de optocht waas ‘t lache, giere, brulle, en ging de waereldj veur os ope.
Mer 4 waeke veur eine prinsewage is toch neet te kort maag ich hope?

 

Ten 11e
De boontje aovendj is al jaore van vrieët hoeëg niveau.
Veur alle collega artieste eine dikke chapeau
Zoatmaale en Zoatmaalinne,

Haaltj uch ein kleurriêk pekske van zolder,

dan weurdj ut ein vastelaoves seizoen met völ lol en kolder

Same de sjoeënste meziek make, en ut vel van de trom good rake.

Louptj mèt in de optocht det is tof, en verdeentj allemaol eine 1e priês met lof.

Dreenktj uch ein glaeske beer en gaotj pas laat nao bèd, dan doon wae zeker mèt uch mèt

Geneetj van dees Limburgse cultuur, det is pas gaaf
Dan sjeete wae same met die daag de vogel aaf.

 

En det alles onger mien devies,

 

Al aaf, Alaaf!